ظهرلي ف التايم لاين اكتر من مره ابن احمد الباز، طفل لسه صغير بيسعى ويجتهد وعايز يمشي ع خطى ابوه ويعمل مطعم خاص بيه طبعا الكومنتات كلها عباره عن انه "مولود ف بمعلقه دهب" ولما يرد ويقول انا مش هستسلم وهكمل لحد ما اوصل الناس ترد تقول "توصل فين انت هناك اصلا" بس لو ركزت ف الموضوع شوية هتعرف ان انت واقف قدام حاله نادره مش بتتكرر كتير وقد تكون محصلتش قبل كدا اصلا عشان كدا شغل دماغك وركز معايا 

النجاح للجيل التاني بيكون صعب والتالت اصعب والرابع شبه مستحيل، لان انت بتتكلم مع ناس معندهمش اي سبب يخليهم يحاولوا او يجتهدوا، ناس اتولدوا لقوا اهلهم اغنياء كل طلباتهم مجابه عاشوا حياة غيرهم لا يجرؤ انه يحلم يعيشها ف الناس دي معندهاش اي سبب يخليها تروح تشتغل من 10ل6 مثلا معندهاش اي سبب يخليها تقعد على كورس وتتعلم معندهاش اي سبب يخليها تدور ع عميل فري لانس وتعرض ع الناس شغل ببلاش عشان تجمع داتا على عكسك انت، انت ممكن تكون شايل مصاريفك او مصاريف اسرتك كلها انت لو مشتغلتش النهارده ممكن تنام من غير اكل عادي وبالمناسبه انت لو موصلتش لمرحلة انك لو مشتغلتش النهارده هتنام من غير اكل يبقا انت لسه مجبتش اخرك ف الشغل 

المهم ان هنا صعوبة الموضوع انت بتشتغل عشان تعيش (ده ف حد ذاته غلط بس مش موضوعنا) هو بقا ان ملقاش هدف تاني يشتغل عشانه عمره ما هيشتغل عشان كدا النجاح ف الاجيال الاصغر بتكون ضعيفه وشبه مستحيله

طيب كل ده ممكن يحصل ليه بقا قلت ان حالة ابن احمد الباز تحديدا دي نادره جدا 

يسطا انت واقف قدام واحد عمل كل ده وهو لسه طفل، كل الاطفال اللي مكانه مبيفكروش ف اي حاجه غير اللعب والخروجات والهدايا وما خلافه بل واغلبهم اصلا ميعرفش ان في حاجة اسمها شغل بتجيب فلوس، انما التربيه الصح اللي رباها احمد الباز لابنه وصلته لكل ده ولو حتى ابوه بيقوله اعمل كذا وكذا ف ده لا يقلل من اي شيئ 

اسعى واجتهد ف طريقك كل واحد جيه الدنيا عشان يوصل رساله، اعرف رسالتك اي وشوف هتوصلها ازاي وسيبك من كل العبط اللي داير حواليك وملكش دعوه بمين نجح ومين فشل